Jón Dan - Innköllun sægreifa

Höfundur er meiraprófsbifreiðastjóri að mennt og á að baki glæsta framtíð í þeirri atvinnugrein.

Hann hefur ennfremur verið hákarlasjómaður, kennari, kokkur á togara, skólastjóri, svínafitubræðslumaður, blaðamaður, ritstjóri, sauðamaður, bókavörður, strætóbílstjóri, þýðandi, bóndi, framkvæmdastjóri, auglýsingasali, múrari og leigubílstjóri svo nokkuð sé nefnt.

Aðeins einu sinni hefur höfundinum borist atvinnuuppsögn. Hún var munnleg og með þriggja daga eftirvara.

Höfundurinn hefur nú loksins náð tilskildum aldri til að geta lokað ferilskránni með titlinum „Opinber starfsmaður án vinnuskyldu".

JonDan.is

Blogg Greinasafn Myndir

Hver er maðurinn Fyrir mitt minni Minningabrot Af öðrum toga Fjölskyldufréttir/Fami...

Jón Daníelsson
Gráskeggur úr Hrútafirði

jún.

30

2009

Stjórnmál

Innköllun sægreifa

Umfjöllun Helga Seljan í Kastljósi gærkvöldsins varpaði enn nýju ljósi á óseðjandi græðgi auðmanna. Möskvastærð kvótakerfisins sjálfs er svo rífleg að þetta kerfi heldur ekki nokkrum sköpuðum hlut. Úthafsrækja er látin óveidd til að gróðafíklarnir geti leigt frá sér enn meiri kvóta. Og það er meiri gróðavegur að selja fiskinn óveiddan en að veiða hann sjálfur. Er nokkur ástæða til að gefa þessum mönnum 20 ára umþóttunartíma? Er ekki einfaldlega réttast að innkalla allan kvóta strax? Og kannski væri rétt að innkalla sægreifana sjálfa án tafar ? til afplánununar.

Gallarnir á fiskveiðstjórnunarkerfinu eru svo margir og svakalegir að í rauninni er ekki nema eitt að gera: Það þarf að kippa öllu fjandans draslinu úr sambandi. Segja má að kerfið bjóði upp á skipulagða glæpastarfsemi, hvort heldur sem menn vilja skilgreina glæpi á forsendum almenns siðferðis eða í hinum þrönga skilningi laga. Brottkast er lögbrot og þar með refsivert. Kvótaleiga er lögleg en í flestum tilvikum siðlaus og hefði vísast í mörgum tilvikum talist lögbrot á árum áður, meðan enn voru í gildi í landinu lög sem bönnuðu okurlán.

Talsmenn útgerðarauðvaldsins segja að atvinnugreinin sem heild fari á hausinn ef kvótinn verður innkallaður. Ég spyr: Og hvað með það? Er ekki stór hluti þessara fyrirtækja á hvínandi kúpunni hvort eð er? Er ekki stór hluti þessara fyrirtækja yfirveðsettur ýmist vegna kvótakaupa eða hlutabréfabrasks? Er ekki skynsamlegra að ríkið leysi til sín yfirveðsett skip, fremur en að haldið sé áfram að lána þeim peninga sem ekki eru til?

Ef menn endilega vilja er í sjálfu sér vel hægt að stjórna fiskveiðum með því að úthluta kvóta. En það þarf að gera á gjörbreyttum forsendum. Ríkið á að leigja frá sér aflaheimildir beint. Ríkið þarf á þessum peningum að halda. Við höfum ekki efni á að gefa þá fáeinum útvöldum gróðafíklum. Brottkast á heldur ekki að líðast, en það er reyndar enginn vandi að koma í veg fyrir brottkast. Til þess þarf ekki annað en skynsamlega hugsað regluverk.

Umfjöllun Helga Seljan í Kastljósi er að finna hér.

Til baka Efst á síðu

Skrá athugasemd