Jón Dan - Skattalækkanir Bjarna Ben: Gagnast þær okkur?

JonDan.is

Hver er maðurinn Fyrir mitt minni Minningabrot Af öðrum toga Fjölskyldufréttir/Fami...

Jón Daníelsson
Gráskeggur úr Hrútafirði

okt.

19

2017

Stjórnmál

Skattalækkanir Bjarna Ben: Gagnast þær okkur?

Sjálfstæðismenn lofa skattalækkunum fyrir hverjar kosningar. Það er ekkert nýtt. Bjarni Benediktsson, formaður Sjálfstæðisflokksins, útskýrði lækkun tekjuskatts örlítið í þættinum „Forystusætið“ á RÚV um daginn. Og þær skýringar eru fróðlegar:

Bjarni: Þess vegna er ég líka að minnast hér á lækkun tekjuskatts. Mér finnst ósanngjarnt að fólk borgi meira en 35% tekjuskatt, þegar það hefur nýtt persónuafsláttinn sinn. Mér finnst það bara ósanngjarnt og við eigum að stefna að því að fara með tekjuskattinn þangað niður.
Ægir Þór: Og ætlið þið að lækka hann þá?
Bjarni: Það er stefnumál hjá okkur og hefur alltaf verið. Við eru í raun og veru eini flokkurinn ...
Ægir Þór: Er búið að útfæra það eitthvað? Hversu mikið ...?
Bjarni: 35% er ég að segja að sé hæfilegur tekjuskattur þegar fólk hefur nýtt persónuafsláttinn.

Hvað merkir þetta? Flestir þekkja skattprósentuna 37% á launaseðlinum (36,94% nákvæmlega tiltekið) og kannski er auðvelt að draga þá ályktun að það sé þessi tala sem eigi að fara niður í 35%. Og þá yrðu væntanlega allir glaðir, eða hvað?

En Bjarni á reyndar ekki við þetta, heldur allt annað. Hann er hér að tala um skattbyrðina, sem sé það hlutfall af heildarlaunum okkar sem fer í staðgreiðslu tekjuskatts og útsvars. Skattbyrðin er talsvert misjöfn. Hjá öldruðum og öryrkjum er hún á bilinu 14-18% af strípuðum tekjum, eftir því hvort þeir búa einir eða ekki. Skattbyrði af meðallaunum (600-700 þúsund) er nálægt 27%. Reyndar greiðir enginn meira en 35% launa sinna í tekjuskatt (og útsvar), nema launin fari yfir 1,4 milljónir á mánuði. Þetta er auðvelt að reikna með því að setja upp einfaldan launaseðil í Excel.

Laun forsætisráðherra eru samkvæmt launatöflu kjararáðs rétt ríflega 1.490.000,- á mánuði og Bjarni Benediktsson greiðir samkvæmt því tæplega 610 þúsund í skatt eða 35,6%. Til að komast niður í 35% þarf að lækka skattgreiðslur hans um 10 þúsund á mánuði.

En fjölmargir hafa miklu hærri laun. Fletti maður tekjublaði Frjálsrar verslunar frá í sumar má lesa langar nafnarunur fólks með tvær til fjórar milljónir í mánaðarlaun. Hærri laun eru ekki endilega fátíð og jafnvel má finna dæmi um meira en 20 milljónir mánuði.

Lítum aðeins á launin sem Bjarna finnst ósanngjarnt að skattleggja svona svakalega:
Sá sem hefur tvær milljónir á mánuði greiðir 757 þúsund í skatt eða 37,9% launanna.
Sá sem hefur þrjár milljónir á mánuði greiðir 1201 þúsund í skatt eða slétt 40%.
Sá sem hefur fjórar milljónir á mánuði greiðir 1645 þúsund í skatt eða 41,1%.

Bjarni Benediktsson vill sem sagt lækka skatta á alla sem hafa meira en 1,4 milljónir á mánuði. Enga aðra. En það munar talsvert um þetta. Fólkið sem hefur fjórar milljónir á mánuði fengi 250 þúsund í skattaafslátt. Það slagar hátt í heil mánaðarlaun þeirra sem eru bótum eða lægstu töxtum. - Og er reyndar talsvert hærri upphæð en þetta fólk fær útborgað eftir skatt.

Háttvirtir kjósendur ættu að rýna örlítið í tölurnar á launaseðlunum sínum, áður en þeir láta freistast af þessu 35% skattahámarki Sjálfstæðisflokksins. Ekki einu sinni tíundi hver landsmaður nýtur góðs af slíkri skattalækkun. Hún er bara fyrir útvalda. Bara fyrir þá allra ríkustu.

En kíkið endilega á þáttinn og horfið á Bjarna útskýra umhyggju sína fyrir skattgreiðendum með eigin augum. Ummælin falla þegar 7:30 mín. eru liðnar af þættinum og þátturinn er hér:

Myndin er stolin af netinu og sýnir úlf í sauðargæru. Hún er sem sagt ekki af Bjarna Benediktssyni.

Til baka Efst á síðu

Skrá athugasemd