Jón Dan - Lítilræði um heiftúð og illvilja

Höfundur er meiraprófsbifreiðastjóri að mennt og á að baki glæsta framtíð í þeirri atvinnugrein.

Hann hefur ennfremur verið hákarlasjómaður, kennari, kokkur á togara, skólastjóri, svínafitubræðslumaður, blaðamaður, ritstjóri, sauðamaður, bókavörður, strætóbílstjóri, þýðandi, bóndi, framkvæmdastjóri, auglýsingasali, múrari og leigubílstjóri svo nokkuð sé nefnt.

Aðeins einu sinni hefur höfundinum borist atvinnuuppsögn. Hún var munnleg og með þriggja daga eftirvara.

Höfundurinn hefur nú loksins náð tilskildum aldri til að geta lokað ferilskránni með titlinum „Opinber starfsmaður án vinnuskyldu".

JonDan.is

Blogg Greinasafn Myndir

Hver er maðurinn Fyrir mitt minni Minningabrot Af öðrum toga Fjölskyldufréttir/Fami...

Jón Daníelsson
Gráskeggur úr Hrútafirði

sep.

12

2017

Stjórnmál

Lítilræði um heiftúð og illvilja

Þegar forstjóri Útlendingaeftirlitsins sér fram á að Alþingi muni á næstunni veita 11 ára stúlku, í langvinnu taugaáfalli eftir ævilanga hrakninga, íslenskan ríkisborgararétt, ásamt bækluðum föður sínum, hvernig á þá að bregðast við?

Útlendingastofnun heyrir undir dómsmálaráðherra, sem situr í því embætti svo lengi sem Alþingi treystir honum til þess. Forstjóri Útlendingastofnunar er sem sagt talsvert neðar í valdastiganum en Alþingi. Þjóðin kaus aldrei þennan forstjóra. En þjóðin kaus Alþingi. Alþingi fer með löggjafarvaldið og á því síðasta orðið. Alþingi ræður – ekki forstjóri Útlendingastofnunar.

Maður skildi ætla að forstjóri Útlendingastofnunar sæi ljósið og léti kyrrt liggja. Lýsti því kannski yfir að feðginin verði ekki flutt úr landi fyrr en Alþingi hefur tekið lokaákvörðun. Viðbrögðin urðu þó önnur, einna líkust því að forstjórinn líti á boðað frumvarp Samfylkingarinnar sem persónulega árás á sig.

Það var sem sé drifið í því í snarhasti að ákvarða brottvísunardag, kalla föðurinn fyrir og afhenda honum formlega tilkynningu um stað og stund. Með þriggja daga fyrirvara. Feðginin skyldu flutt úr landi áður en lagafrumvarpið um að veita þeim ríkisborgararétt gæti mögulega komist til umræðu á Alþingi. Svo mikið lá forstjóranum á, að einhver smávægilegur formgalli læddist inn í textann. Það gaf ríkislögreglustjóra ástæðu til að fara fram á frestun.

Þessi viðbrögð forstjóra Útlendingastofnunar eru eiginlega stórmerkileg. Í þeim felst svo skelfilegur hroki. Hvaða tilgangi getur það þjónað að flytja fólk úr landi, þegar fyrirsjáanlegt er að það verði sótt aftur innan fárra vikna? Við vitum nákvæmlega hverjar afleiðingarnar verða. Þetta eykur enn á vanlíðan og öryggisleysi stúlkunnar og föður hennar.

Þannig er engu líkara en forstjóri Útlendingastofnunar sé að reyna að nota síðasta tækifæri sitt til að níðast á þessum vanmáttugu feðginum, sem leituðu skjóls hjá okkur í neyð sinni og örvæntingu. Nota tækifærið til að snúa hnífnum í sárinu. Sparka einu sinni enn.

Það er sem sé ekki unnt að koma auga á neina skynsamlega eða rökrétta ástæðu fyrir þessari framkomu. Það sem við okkur blasir eru einfaldlega illvilji og heiftúð. Fyrir þessa hegðun borgum við nærri 1,4 milljónir á mánuði auk launatengdra gjalda.

Til baka Efst á síðu

Skrá athugasemd