Jón Dan - Kóngur árið 2100

Höfundur er meiraprófsbifreiðastjóri að mennt og á að baki glæsta framtíð í þeirri atvinnugrein.

Hann hefur ennfremur verið hákarlasjómaður, kennari, kokkur á togara, skólastjóri, svínafitubræðslumaður, blaðamaður, ritstjóri, sauðamaður, bókavörður, strætóbílstjóri, þýðandi, bóndi, framkvæmdastjóri, auglýsingasali, múrari og leigubílstjóri svo nokkuð sé nefnt.

Aðeins einu sinni hefur höfundinum borist atvinnuuppsögn. Hún var munnleg og með þriggja daga eftirvara.

Höfundurinn hefur nú loksins náð tilskildum aldri til að geta lokað ferilskránni með titlinum „Opinber starfsmaður án vinnuskyldu".

JonDan.is

Blogg Greinasafn Myndir

Hver er maðurinn Fyrir mitt minni Minningabrot Af öðrum toga Fjölskyldufréttir/Fami...

Jón Daníelsson
Gráskeggur úr Hrútafirði

júl.

25

2013

Almennt

Kóngur árið 2100

Sá ungi sveinn sem fæddist inn í bresku konungsfjölskylduna fyrir nokkrum dögum, verður líklega kóngur á Bretlandi árið 2100, að vísu kominn vel við aldur. Flestu fólki finnast næstu aldamót í svo langri fjarlægð, að það taki því ekki að velta þeim fyrir sér.

Ártalið 2100 skýtur þó oft upp kollinum, einkum þegar menn velta fyrir sér áhrifunum af hlýnun jarðar. Verði ekkert að gert, verður meðalhiti á jörðinni nokkru hærri en nú. Um gráðuföldann eru menn ekki alls kostar sammála.

En sjávarborð mun hækka, einkum vegna bráðnunar jökla. Sumir telja að stórborgir geti farið á kaf. Veðurfar breytist. Við erum þegar farin að sjá þess merki. Sums staðar í heiminum herja þurrkar og gróður eyðist. Annars staðar verða stórflóð og tilheyrandi aurskriður mun algengari. Fellibyljir eru þegar orðnir tíðari og frá Bandríkjunum fáum við árlega æ fleiri fréttir af skýstrókahamförum.

Á Íslandi verðum við líka vör við breytingar. Hlýnandi sjór veldur því að makríll veiðist í lögsögunni. Hlýni sjórinn enn frekar, gæti þorskurinn okkar aftur á móti flúið til norðurs og lagt undirstöðuatvinnuveg okkar í rúst.

Enn verra er þó, að heimshöfin eru að súrna. Sýran leysir upp kalk og gerir skelmyndun erfiðari. Þetta hefur gríðarleg áhrif á vistkerfi og fæðukeðju. Mörg smádýr, neðst í fæðukeðju sjávarins, eru í rauninni örsmá krabbadýr með skel. Súrnunin er mest nyrst og syðst á hnettinum og áhrifin munu því sjást á Íslandsmiðum tiltölulega snemma.

Þetta eru aðeins örfá dæmi. Við vitum lítið um þær breytingar, sem gróðurhúsaáhrifin eiga eftir að valda, annað en að þær verða miklar. Það er hlutverk núlifandi kynslóða að reyna að lágmarka þær.

Og í því sambandi getur verið hollt fyrir foreldra, sem eru að eignast börn um þessar mundir og á allra næstu árum, að hugsa til þess að það verða einmitt börnin þeirra, sem fylla elliheimilin árið 2100.

Þannig verður mun auðveldara að skynja hversu skammur tími er til stefnu.

Til baka Efst á síðu

Skrá athugasemd