Jón Dan - Lifi Hraðbraut!

Höfundur er meiraprófsbifreiðastjóri að mennt og á að baki glæsta framtíð í þeirri atvinnugrein.

Hann hefur ennfremur verið hákarlasjómaður, kennari, kokkur á togara, skólastjóri, svínafitubræðslumaður, blaðamaður, ritstjóri, sauðamaður, bókavörður, strætóbílstjóri, þýðandi, bóndi, framkvæmdastjóri, auglýsingasali, múrari og leigubílstjóri svo nokkuð sé nefnt.

Aðeins einu sinni hefur höfundinum borist atvinnuuppsögn. Hún var munnleg og með þriggja daga eftirvara.

Höfundurinn hefur nú loksins náð tilskildum aldri til að geta lokað ferilskránni með titlinum „Opinber starfsmaður án vinnuskyldu".

JonDan.is

Blogg Greinasafn Myndir

Hver er maðurinn Fyrir mitt minni Minningabrot Af öðrum toga Fjölskyldufréttir/Fami...

Jón Daníelsson
Gráskeggur úr Hrútafirði

feb.

23

2011

Almennt, Stjórnmál

Lifi Hraðbraut!

Menntaskólinn Hraðbraut skilar ungmennum úr grunnskóla upp í háskóla á tveimur árum. Þetta er auðsæilega góður og nauðsynlegur valkostur, bæði fyrir afburðanemendur beint úr grunnskóla og dálítið þroskaðri ungmenni, sem af einhverjum ástæðum hafa tekið sér hlé, en hafa bæði vilja og getu til að taka upp þráðinn að nýju.

Nemendur skólans hafa verið ánægðir og það er gott. Þeir hafa reynst ná ívið slakari árangri en meðaltal annarra nemenda við Háskóla Íslands. Það er ekki endilega marktækt meðan ekki liggur fyrir samsvarandi tölfræði varðandi aðra framhaldsskóla.

Menntamálaráðherra hefur nú ákveðið að endurnýja ekki þjónustusamning við skólann. Það jafngildir auðvitað dauðadómi. Ákvörðunin byggist á áliti 7 þingmanna af 9 í menntamálanefnd Alþingis og áliti Ríkisendurskoðunar.

Þegar rennt er í gegnum álit menntamálanefndar, er strax augljóst að ákvörðun ráðherrans er rétt – því miður.

Eigendur skólans hafa seilst fulldjúpt í ríkiskassann. Þeir reka tvö aðskilin einkahlutafélög, Faxafen ehf, sem á húsnæðið, og Hraðbraut ehf, sem rekur skólann og greiðir Faxafeni ehf leigu. Það getur út af fyrir sig verið skynsamleg varúðarráðstöfun að skilja á milli fasteignar og reksturs, en hér virðist megintilgangurinn vera annar.

Að því er ég fæ lesið úr ofangreindri umfjöllun hafa eigendur Hraðbrautar ehf greitt sér 82 milljón króna arð, auk þess sem Faxafen ehf hefur greitt 95 milljónir í arð frá stofnun (2004). Til að bæta gráu ofan á svart felldi menntamálaráðuneytið á sínum tíma niður 92 milljónir af skuld Hraðbrautar ehf – rétt rúmlega arðgreiðslurnar.

Og þótt eigendurnir (meira eða minna þeir sömu) taki sér þannig alls vel yfir 170 milljónir út úr rekstrinum, hafa verið gerðir sérstakir launasamningar við hvern og einn í kennarahópnum og þar kveðið á um launaleynd. Kennarasambandið undirbýr nú málssókn vegna undirborgana.

„En þetta er hápólitísk aðför að skólanum.“ Svo segir skólastjórinn í viðtali við RÚV og ég nenni ekki einu sinni að fara út í þá sálma.

Lifi Hraðbraut! Fyrirsögn þessa pistils er ekkert grín. En þessi menntaskóli þarf nýja eigendur, sem eiga sér æðri hugsjón en að totta ríkisjúgrið. Fráfarandi skólastjóri á held ég aðeins einu verkefni ólokið: Að borga.

Til baka Efst á síðu

Skrá athugasemd