Jón Dan - Áramótaskaup The Telegraph

JonDan.is

Hver er maðurinn Fyrir mitt minni Minningabrot Af öðrum toga Fjölskyldufréttir/Fami...

Jón Daníelsson
Gráskeggur úr Hrútafirði

des.

30

2010

Almennt, Stjórnmál

Áramótaskaup The Telegraph

Í hádegisfréttum útvarpsins voru mér sagðar þær fréttir að pólitísk afstaða væri meðfædd. Í hægri mönnum er heilastöðin „Amygdala“ (aðsetur óttans) óvenju stór, en heilastöðin „Anterior cingulate“ (aðsetur hugrekkis og bjartsýni) fremur lítil. Í vinstri mönnum er þessu öfugt farið.

Þetta þótti mér merkileg frétt. Hún var höfð eftir The Telegraph - og er þar.

Kannski hafa Bretar lært það af íslensku útrásarhákörlunum að setja saman áramótaskaup.

Eftir dálitla umhugsun hallast ég þó að því að fréttin eigi við rök að styðjast, rannsóknin hafi raunverulega verið gerð og skilað þessum niðurstöðum. Hugmyndin er nefnilega ekki algalin.

Fólk sem hallast til hægri í stjórnmálaskoðunum telur sig gjarnan íhaldssamt, sem sagt fastheldið á hin gömlu og góðu gildi. Maður veit hvað maður hefur en ekki hvað maður fær, gæti verið kjörorðið. Í rauninni kemur þetta vel heim og saman við óttatilfinningu, einhvers konar þrá eftir fullkomnu öryggi, sem maður telur eðlilega felast í óbreyttum aðstæðum – og þar með stöðugleika samfélagsins.

Fólk sem hallar sér til vinstri er þvert á móti ævintýragjarnt, jafnvel fífldjarft, teflir óþægilega oft á tæpasta vað og treystir á Guð og Lukkuna. Sem sagt afar hugrakkt og bjartsýnt. Eða kannski bara svona vitlaust.

Líti maður svo sem 10 þúsund ár aftur í tímann, er augljóst hvor hópurinn það var, sem hafði forystu um þróun mannkynsins frá veiðum og berjatínslu til geimaldartækni. Vinstri menn fundu upp á því að binda yddaða tinnusteina framan á sterkar trjágreinar, en hægri mennirnir sátu heima og létu nægja að opna munninn þegar konurnar færðu þeim ber og rætur, eða kannski héra sem hafði fest sig í gildru.

Við vinstri menn getum loksins fagnað stórum sigri – vísindalegri sönnun fyrir tilverurétti okkar. Að því sögðu þykir mér auðvitað helvíti hart að þurfa – í heiðarleikans nafni – að bæta örlitlu við:

Staðreyndin er sem sé sú, að heilastöðvar þroskast misjafnlega, allt eftir því hverjar maður notar mest. T.d. er löngu sannað að erfiðismenn þroska aðrar heilastöðvar en skrifborðsmenn.

Enda er það haft eftir vísindamönnunum sjálfum í „The Telegraph“ að þeir treysti sér ekki til að fullyrða hvort mismunandi stærð þessara heilastöðva sé meðfædd eða uppþroskuð með aldrinum.

Hitt má þó vera hægrimönnum til ævarandi skammar að „miðstöð hugrekkis og bjartsýni“ vinstri manna er staðsett í framanverðum heilaberkinum, en „amygdala“ er í heilanum miðjum. Í tímans rás virðist heilinn hafa þróast þannig að hann hefur bætt utan á sig. Heilabörk er held ég aðeins að finna hjá spendýrum.

Amygdala-heilastöðin er í öllum hryggdýrum, t.d hænsnum og froskum. Síhrædd kvikindi. Vissulega ekki að ástæðulausu.

Og satt að segja var nokkuð gaman að skrifa þennan pistil.

Til baka Efst á síðu

Skrá athugasemd

des.

30

10:17

2010

Baldurkr

Og gaman að lesa hann....Kv. Baldur