Jón Dan - Þóra á leik

Höfundur er meiraprófsbifreiðastjóri að mennt og á að baki glæsta framtíð í þeirri atvinnugrein.

Hann hefur ennfremur verið hákarlasjómaður, kennari, kokkur á togara, skólastjóri, svínafitubræðslumaður, blaðamaður, ritstjóri, sauðamaður, bókavörður, strætóbílstjóri, þýðandi, bóndi, framkvæmdastjóri, auglýsingasali, múrari og leigubílstjóri svo nokkuð sé nefnt.

Aðeins einu sinni hefur höfundinum borist atvinnuuppsögn. Hún var munnleg og með þriggja daga eftirvara.

Höfundurinn hefur nú loksins náð tilskildum aldri til að geta lokað ferilskránni með titlinum „Opinber starfsmaður án vinnuskyldu".

JonDan.is

Blogg Greinasafn Myndir

Hver er maðurinn Fyrir mitt minni Minningabrot Af öðrum toga Fjölskyldufréttir/Fami...

Jón Daníelsson
Gráskeggur úr Hrútafirði

mar.

25

2012

Almennt, Stjórnmál

Þóra á leik

Nokkur atriði vekja athygli í niðurstöðum Capacent-könnunarinnar á fylgi við mögulega forsetaframbjóðendur. Sitjandi forseti fær aðeins 34%, en 66% velja einhvern annan kost og vilja sem sagt skipta um forseta. Af mögulegum keppinautum fær Þóra Arnórsdóttir langmest fylgi, eða 14,5%. Þær þrjár konur sem spurt var um, raða sér í efstu sætin á eftir Ólafi Ragnari. Loks er svo dreifing atkvæða milli þeirra fimm, sem koma næst á eftir Ólafi og Þóru, furðu jöfn eða 6-7,8% og munurinn þar með ekki tölfræðilega marktækur.

Þátttakendur gátu einnig valið 2. og 3. valkost og sé tekið tillit niðurstaðna varðandi þá valkosti, dregur verulega úr forskoti Ólafs Ragnars og hann hefur þá aðeins um þriðjungi meira fylgi en Þóra.

Það þarf alltaf að fara gætilega í að túlka niðurtöður skoðanakannana. Gildi þeirra getur verið misjafnt eftir því hversu margir þátttakendur taka afstöðu. Ekki má rugla þessu saman við svokallað „svarhlutfall“, sem gefur til kynna það hlutfall úrtaksins sem náðist í. Svarhlutfallið var tæp 63% sem mun nálægt meðallagi í könnun af þessu tagi.
Hitt vekur athygli að tæp 83% þeirra sem á annað borð tóku þátt í könnuninni, tóku afstöðu. Þetta verður að teljast hátt hlufall og niðurstöðurnar að því leyti talsvert marktækar.

Á þeim grundvelli ætti að mega fullyrða að allstór meirihluti landsmanna vilji nýjan forseta á Bessastaði, varla færri en um 60% og sennilega heldur fleiri. Hitt má líka fullyrða að hugmyndir fólks um nákvæmlega hvaða mann eða konu við ættum að velja sem nýjan forseta eru nokkuð dreifðar. Þannig er ekki tölfræðilega marktækur munur á Elínu Hirst og Stefáni Jóni Hafstein, sem lentu í 3. og 6. sæti.

Hér hefur Þóra Arnórsdóttir áberandi sérstöðu. Hún fær nærri tvöfalt fylgi á við Elínu Hirst, sem kemur næst og nánast nákvælega tvöfalt fylgi Salvarar Nordal. Af hugsanlegum mótframbjóðendum er fylgi hennar langmest. Hún bætir líka mestu við sig þegar spurt er um 2. og 3. valkost.

Niðurstöður könnunarinnar setja sem sagt nokkra pressu á Þóru Arnórsdóttur (og fjölskyldu hennar). Það verður að teljast eðlilegt að aðrir, sem nú eru í startholunum, bíði eftir niðurstöðu Þóru. Þau kannski 60% atkvæða sem virðast munu falla gegn Ólafi Ragnari samkvæmt þessari könnun, eru nefnilega ekki til skiptanna. Sigurlíkur mótframboðs byggjast fyrst og fremst á því að kosningabaráttan verði einvígi Ólafs Ragnars og aðeins eins mótframbjóðanda.
Það er sem sagt Þóra Arnórsdóttir sem á leik.

Til baka Efst á síðu

Skrá athugasemd