Jón Dan - Dómaraskandall en góður sigur

JonDan.is

Hver er maðurinn Fyrir mitt minni Minningabrot Af öðrum toga Fjölskyldufréttir/Fami...

Jón Daníelsson
Gráskeggur úr Hrútafirði

apr.

01

2011

Almennt

Dómaraskandall en góður sigur

Ég get ekki stillt mig um að skrifa lítinn pistil um Útsvar kvöldsins, svo ómerkilegt umfjöllunarefni sem það eiginlega er. Ég horfði á þennan þátt með fyrirfram ákveðinni gleði, vegna þess að ljóst var að „dollan“ færi norður, svo og vegna þess að í miðsætunum báðum sátu gamlir og góðir kunningjar mínir.

Og kannski er líka gaman að lyfta augnaráðinu upp frá því sem raunverulega skiptir máli og leyfa sér að hugsa um einskisverð fyrirbæri. Það er sennilega hollt fyrir sálarlífið. Mér leið vel þegar ég settist við sjónvarpið og mér leið aftur vel þegar ég stóð upp.

En þar mátti reyndar engu muna. Stjórnendurnir – dómarinn og spyrlarnir gerðu nefnilega alvarleg mistök, sem auðveldlega hefðu getað ráðið úrslitum. Þetta var í „leiknum“. Ég á erfitt með að ímynda mér orð sem auðveldara er að leika en „vítaspyrna“ og ég skildi hreint ekki hvers vegna það tók tók tíma að ná því. Leikurinn sjálfur var óaðfinnanlegur.

En orðið kom. Svarið „Rétt“ kom hins vegar ekki. Fyrir bragðið var haldið áfram í sennilega 20-30 sekúndur og leitað að öðrum orðum, en sú leit var auðvitað vonlaus. Og einmitt þess vegna missti lið Norður-Þings af tækifærinu til að ná kannski 3 atriðum í viðbót – og þar með mögulega 9 stigum. Um það verður þó ekkert fullyrt.

Svo merkilegt sem það er, fór ekki fram hjá neinum að Þingeyingarnar nefndu rétta svarið – að fráteknum dómar og spyrlum. Salurinn baulaði. Upptakan var spiluð fyrir dómarann sem ákvað – eðlilega – að gefa 3 stig fyrir rétt svar. Hins vegar virðist ekki hafa hvarlað að honum að mæla tímann sem eytt var í þessa spurningu eftir að rétta svarið kom og gefa liði N-Þing þann tíma til að svara fleiri leikatriðum.

Það var af þessari ástæðu sem ég velti því fyrir mér í auglýsingahléinu, hvort Birgir Guðmundsson kynni að reka hnefann í borðið í lok þáttar (ef Akureyringar hefðu sigrað með örfárra stiga mun) og krefjast þess að Þingeyingar fengju að nýta þann tíma sem dómarinn hafði af þeim.

Það vill nefnilega svo til að Birgir þessi er gamall vinnufélagi minn og vinur og mér er mætavel kunnugt um að hann er mikill heiðursmaður. Svo mikill heiðursmaður að ég gæti vel trúað honum til að krefjast réttlætis fyrir hönd andstæðinganna.

Svo kom að mikilvægustu spurningu kvöldsins. Svartfuglinum sem ekki verpir lengur á Íslandi vegna þess að hér er orðið of hlýtt. Ég engdist sundur og saman með Birgi, því ég gat ekki heldur komið fyrir mig þessu einfalda nafni: Haftyrðill.

Húsvíkingurinn Þorgeir Tryggvason var aftur á móti ekki í neinum vandræðum og fékk þarna þau 3 stig sem á endanum réðu úrslitum. En vel að merkja: Þorgeir Tryggvason er líka gamall kunningi minn og líka mikill heiðursmaður, reyndar allt of mikill heiðursmaður til að krefjast þeirra 20-30 sekúndna sem stjórnendurnir höfðu af Þingeyingum.

Sem sagt: Til hamingju Þingeyingar og Akureyringar. Mér þykir vænt um sérhvert sigurtákn sem endar fyrir utan „stóru flóttamannabúðirnar“ hér fyrir sunnan.

Ég geri svona ósjálfrátt ráð fyrir því að þessi pistill hljóti að hafa verið fremur leiðinlegur aflestrar og þess vegna er rétt að verðlauna þá lesendur sem hafa nennt að lesa hingað. Því miður hef ég ekki efni á að veita verðlaun fyrir rétt svar. Verðlaunin felast í glímunni við spurninguna. Og spurningin er þessi:

Hvaða sveitabær á Íslandi er fjarlægastur Lækjartorgi?

Til baka Efst á síðu

Skrá athugasemd